هزينا قدم و حطينا قدم
و ترجيناك تزيح الغم
هزينا قدم و حطينا قدم
ها حنا بين يديك تنصفنا آ الحاكم
هزينا قدم و حطينا قدم
خديمك طغى و تسلط ......
أنا نبني و هو يهدم
هزينا قدم و حطينا قدم
الحي بعينيه يشوف ساكت....
و الجيفة تحل ليها الفم
درت يدي فوق راسي
و هربت عطيت ساقي للريح
شياطن الحاكم ساسوا لي ضراسي
و الشمكارة تغوت و تصيح
درت يدي في يد خويا
قلنا صوتنا يوصل للمعلم
كلاب الكرنة و قلال النية
حبسوا طريقنا قالوا حدك تم
درت يدي في جيبي
قلت نشري كسرة خبز لاولادي
ما لقيت باش نطرد جوعي
وا المعلم !!!!! وا انت فين بي غادي
و من اليوم جمعت يديا
و درت يدي في يد الله
و اللي بغات تكون تكون
و نقسم بأغلى ما عند في الدنيا
يا من دابا لا عشت مغبون
انت عايش و انا عايش
و فرق كبير ما بين عيشة و عيشة
الله وا آ هيا انت تكايس
راك خويتي زاد الخنيشة
شي عايش و شي عايش
و عيشة الكلب ما تشبه عيشة مولاه
واحد مدلول وسط الدراوش
و كاين اللي طاح على شي داه
تمنيت صياحي يوصل ليك
ما أنت صمك ما أنا زيزون أبكم
لا تسمع كلام من يزين ليك
وا حدك تم آ المعلم
