الله يعميها لشي بعضين

ما انا عبد..... ما انا
حرطانــــــــــــــي

ما انا خديم ... حتي يعودوا
بحالكم ياكلوا و يشربوا فيا

ما أنت اله ... ما انت رسول
راك غير بنادم أصلو فاني

هزيتو لراسكم المقام ... و طيحتوا
مقامنا حنا ...غير عبيد و رعية

عييت نمعني ...ظنيتكم احرار
غمزة.......... ليكم تكفاني

جاني خبر اليقين ..... رفاقة
المال و الزهو ...آش هاد البلية

و أنا اليوم جيت.... باش نقسم
بأغـــــلـظ ايمــــــــــــــــاني

الخوف نسوســـــــــو .... راه
غير بيكم و لا بيــــــــــــا

و نزيد نعلمكم ..... جوركم
مــــــــا عــــــاد يخلعــــني

راه ما مات من قال كلمة حق
للظالم مزبلة التاريخ
و يا سعدات من مات على شي قضية

صبرنا ... استغفرنا.. طغيانكم
ما قـــــــــال يفـــــــــــــراني

اللهم موتة شريفة في ساحة النزال
و لا هاد اللعب و التفلية

شهدت عليكم الله و الجماعة
على الجور اللي منكم جاني

زدتوا مع الطريق حد ما سمعني
نبكي و نشكي ما بيا

لا تبكي يا امي .... و لا
تخافوا يا قراني

العود اللي تحقرو يعميك .... و الدوام
لمن طلب مرضاة الله و التقيا