صحت صيحة مكلومة
قالوا جاه حالو
و بكيت على حياتي المضيومة
قلتوا شكون بحالو
عيطت عليكم آ خيار الأمة
يا من خرجتوا تأمروا بالمعروف
و تنهاوا على المنكر
حوالكم عادت معلومة
و من شاف شي
يقول الله يستر
تبثتونا بالدين و الملة
غراضكم تقضاوا و حنا
لينا الله و الصبر
الحسد و البغض مرض
في بنادم و علة
و حب النفس يزيدك للهلاكة و الشر
يا من زرعتي الزرعة
و تتسنى تاكل الغلة
كيفاش تاكل لوجدك
و لخوك بنادم ما تنظر
ما حسنتي ما تصدقتي
على اصحاب الحاجة و لو بقلة
راه هيف النفس صعب
من جوع الكرش و الغدر
تاهت سريرة المخلوق
و عاد عايش في التيه و الجلا
و رخاصت اعراض الناس
و عادت في الاسواق تتباع كيف الخرفان و البقر
Aucun commentaire:
Enregistrer un commentaire